ကျွန်မ တန်ဖိုးထားရမည့်အရာ

 "ကျွန်မ တန်ဖိုးထားရမည့်အရာ"

ကျွန်မရဲ့ စာကြည့်စားပွဲမှာ စာထိုင်မလုပ်ဖြစ်တာ ၃လတောင် ရှိပြီလို့ နံရံမှာချိတ်ထားတဲ့ ပြက္ခဒိန်လေးက ပြနေတယ်။ ဟုတ်ပါတယ် မေလကျောင်းစဖွင့်ကတည်းက မထိုင်ဖြစ်ခဲ့တာ။ အရင်အချိန်တွေတုန်းက စားပွဲမှာစာထိုင်လုပ်နေကြဖြစ်တဲ့ ကျွန်မ အခုတလော ဘာတွေလုပ်နေမိပါလိမ့်။ ကျွန်မရဲ့ စာကြည့်စားပွဲလေး အထီးကျန်နေခဲ့တာ ဟိုး…မိုးတွေစရွာကတည်းကပေါ့။ ထိုင်နေကျခုံလေးမှာ မထိုင်တာကြာတော့ ကိုယ့်ထိုင်ခုံ ဟုတ်သေးရဲ့လားလို့တောင် မေးခွန်းထုတ်ရတော့မယ်။ ကိုယ်ပိုင်ဆိုင်ခဲ့ဖူးတဲ့ ခုံလေးဟုတ်သေးရဲ့လားလို့တောင် သံသယဝင်မိတယ်။

ဒီနေ့ညနေတော့ ကျွန်မရဲ့စားကြည့်စားပွဲလေးကို အနွေးဓာတ်ပေးလိုက်တယ်။ ဒီနေ့ တွေ့လိုက်ရတာက တစ်ခုတည်းအနေနဲ့ ရပ်တည်နေတဲ့ စာကြည့်စားပွဲလေးကို အဖော်ပြုပေးနေတဲ့ ထိုင်ခုံလေး။ သိပ်ကိုဂုဏ်ယူဖို့ကောင်းတဲ့ မြင်ကွင်းပေါ့။ အနားကနေ တစ်ဖဝါးမှမခွာဘဲ ဘေးမှာအတူရှိနေပေးတယ်။ ဒီလိုမျိုးလေးမြင်လိုက်ရတော့ ကျွန်မ တော်တော် စိတ်မကောင်းဖြစ်မိတယ်။ ကျွန်မ သူ့ကိုပစ်ပယ်ထားတာ တော်တော်ကြာနေပြီလေ။ ဒီညနေတော့ ဟိုးအရင်ကလိုပုံမှန်အတိုင်း ပြန်ဖြစ်နေပြီလို့ ကျွန်မခံစားရတယ်။ ကျွန်မရဲ့ စာကြည့်စားပွဲမှာထိုင်ပြီး စာတွေလုပ်နေမိတယ်။

တကယ်တော့ ကျွန်မက ကျောင်းစာလုပ်ရမှာပျင်းတဲ့သူတစ်ယောက်ပါ။ အရင်ကအချိန်တွေမှာလဲ စားပွဲမှာထိုင်ပြီး ကျောင်းစာလုပ်တာမဟုတ်ပါဘူး။ စိတ်ကူးထဲရှိတဲ့စာတွေကို ချရေးနေတတ်တာပါ။ အခုတော့ တော်တော်ထူးဆန်းနေပါပြီ။ 

ကျွန်မကိုယ်ကျွန်မဘာလို့ ကျောင်းစာတွေလုပ်နေမိလဲလို့ တွေးနေတာ… စိတ်ပါဝင်စားလို့ စာလုပ်နေတာလား၊ ဒါမှမဟုတ် ဒီနေ့အပြီးမရေးရင် အမှတ်မရမှာစိုးရိမ်လို့လား၊ ဒါမှမဟုတ် တစ်ခုခုကိုမေ့ပျောက်ချင်နေလို့လား။ မေးခွန်းတွေကို စာလုပ်နေရင်းနဲ့ စဉ်းစားနေပေမယ့် တစ်ဝက်လောက်ရောက်မှ အဖြေကထွက်လာတယ်။

စိတ်ညစ်နေရင် ဒါမှမဟုတ် တစ်ခုခုကိုမေ့ပျောက်ချင်ရင် ကျွန်မကျောင်းစာလုပ်တတ်တဲ့ အကျင့်ရှိတယ်။ နောက်ပြီး အရမ်းဝမ်းနည်းနေရင်လည်း ရေခဲမုန့်စားတတ်တယ်။ စာလုပ်တတ်တယ်။ ဒါတွေနဲ့ပဲ စိတ်ကိုဖြေဖျောက်ခဲ့တယ်။ အခုလည်း ကျွန်မဘာကိစ္စကြောင့်များ စာတွေလုပ်နေမိတာပါလိမ့်။ ဘယ်ကိစ္စကိုမေ့ပျောက်ချင်နေတာပါလိမ့်။ စဉ်းစားရင်းနေရင်းနဲ့ပဲ မေ့သွားပြီလား။ ဘယ်မေ့ပါ့မလဲ……ကိုယ်ချစ်ရတဲ့သူ ရင်နာခဲ့ရတဲ့နေ့တွေကို။

တကယ်တော့ သူ့အတိတ်တွေက ကျွန်မနဲ့လုံးဝမဆိုင်ပါ။ ဒါကို ကျွန်မဘာလို့များ စိတ်ဝင်စားနေရတာလဲ။ ဘာလို့များ သိပ်သိချင်နေရတာလဲ။ သူပြောလဲပြောစရာပါပဲ။ ကျွန်မ သူ့အကြောင်းသေချာမသိပါဘူး။ သိချင်လို့ သူ့ကိုမေးတော့လဲ မပြောပြဘူး။ စုံစမ်းတော့လဲ စပ်စုလိုက်တာတဲ့။ ကဲ……ဒီတော့ ကျွန်မဘယ်လိုလုပ်ရပါ့မလဲ။ အတိတ်တွေကို စိတ်မဝင်စားတတ်တဲ့သူ၊ ဒီနေ့နဲ့ မနက်ဖြန်တွေအတွက် အကောင်းဆုံးဖြစ်အောင် ဖန်တီးချင်တဲ့ ကျွန်မကပဲ အတိတ်တွေဆီရောက်ရာက်သွားနေတယ်။

သူ့အတိတ်က ကိစ္စတစ်ခုကိုသိလိုက်ရတာနဲ့ပဲ ကျွန်မခံနိုင်ရည်မရှိလို့ စာတွေထိုင်လုပ်မိနေတယ်။ သူ့အတိတ်ကအကြောင်းတွေကို ကြားမိရုံနဲ့ပဲ ငိုချင်နေမိလို့ ကျောင်းစာတွေကိုလုပ်နေတယ်။ သူနဲ့ပတ်သတ်လာရင် အမှိုက်ကစ ပြဿဒ်မီးလောင်ဆိုသလိုပဲ။ သူ့အတွက် ကိစ္စသေးသေးလေးက ကျွန်မအတွက်တော့ ကြီးကျယ်ခမ်းနားနေတတ်တယ်။ ဘာလိုပဲဖြစ်ဖြစ်ပါ……ကျွန်မရဲ့ စာကြည့်စားပွဲလေးမှာ စာထိုင်လုပ်ဖြစ်အောင် ကူညီပေးတဲ့ သူ့ကိုပိုပြီးချစ်မိသွားပြီ။ 

သူ့ကြောင့် ကျွန်မရဲ့ စာကြည့်စားပွဲလေး ပြန်ပြီးစိုပြေလာပြီ။ စာကြည့်စားပွဲဆိုတာ စာကြည့်တဲ့သူရှိမှ တင့်တည်တာမဟုတ်လား။ ဒီအတိုင်းပစ်ထားလိုက်ရင်တော့ ရိုးရိုးသာမာန် စားပွဲတစ်လုံးဖြစ်သွားမှာပေါ့။ တကယ်တော့……… သက်ရှိပဲဖြစ်ဖြစ်၊ သက်မဲ့ပဲဖြစ်ဖြစ်ပါ ကိုယ်ကပစ်ထားပါများရင် ဒါမှမဟုတ် ကြာသွားရင် အနေဝေးပြီး စိမ်းသွားတတ်တယ်။ ကိုယ်ကတန်ဖိုးမထားတတ်ရင် သူကလဲ ကိုယ့်ကိုတန်ဖိုးထားမှာ မဟုတ်တော့ဘူး။ ဒါကြောင့် ဒီနေ့ညကစပြီး စာလုပ်မယ်ဆိုရင် တခြားနေရာတွေထက် စာကြည့်စားပွဲလေးကိုပဲ တန်ဖိုးထား ဦးစားပေးတော့မယ်။ 

(21 July 2012)

SAT

နရီ