မထင်မှတ်ထားတဲ့ အပြောင်းအလဲ

 "မထင်မှတ်ထားတဲ့ အပြောင်းအလဲ"

ကျွန်မ ဒီနေ့ည အင်တာနက်သုံးနေတုန်း သူနဲ့တွေ့ဖြစ်တယ်။ သူဆိုတာက တစ်ချိန်တစ်ခါက ကျွန်မနဲ့ လက်ထပ်ဖို့အထိ ရွေးချယ်ခံခဲ့ရတဲ့ လူတစ်ယောက်။ သူနဲ့ကျွန်မက ငယ်သူငယ်ချင်းတွေ။ ၃ တန်းလောက်အထိအတူတူ ကျောင်းတက်ခဲ့ဖူးတယ်။ အဲ့ဒီ့တုန်းကတော့ သိပ်မခင်ကြဘူး။ ဒါပေမယ့် ကျွန်မသူငယ်ချင်းတွေရဲ့ နှုတ်ဖျားမှာတော့ သူ့နာမည်ကို အများဆုံးကြားရတာပဲ။ ပြောရမယ်ဆိုရင် သူငယ်ငယ်တုန်းက တော်တော်ချစ်ဖို့ကောင်းတယ်။ ကလေးလေးတွေဆိုတော့ ဖြူစင်တယ်၊ ရိုးသားတယ်၊ နောက်ပြီး အပူအပင်ကင်းတယ်။ (စာမရတာကလွဲလို့ပေါ့လေ) သူနဲ့ ဒီအတိုင်း သူငယ်ချင်းလိုခင်ရတာကိုပဲ ဂုဏ်ယူတယ်။ ဘာဖြစ်လို့လဲဆို ကျွန်မက ဆရာမသမီးဆိုတော့ ယောက်ျားလေးတော်တော်များများက အပေါင်းအသင်းမလုပ်ဘူး။ အနားသိပ်မကပ်ရဲကြဘူး။ ရှိန်တာပေါ့လေ။

ဒီလိုနဲ့ ကျွန်မလဲကျောင်းပြောင်းရော တစ်ခြားသူငယ်ချင်းတွေနဲ့ ကွဲသွားရုံတင်မကဘူး သူနဲ့လဲကွဲခဲ့တယ်။ လွန်ခဲ့တဲ့ ၁၂ နှစ်ကျော်လောက်က ကွဲသွားတာ ပြီးခဲ့တဲ့ ၂၀၁၀ ရောက်မှပြန်တွေ့ဖြစ်တယ်။ ပြန်တွေ့တော့ ကျွန်မအရမ်းကိုပျော်နေမိတယ်။ ဘာကြောင့်အဲလောက်ပျော်နေမှန်းကို ကျွန်မကိုယ်တိုင်မသိခဲ့ပေမယ့် ကျွန်မ အမေကတော့ ရိပ်မိခဲ့တယ်။ ဘယ်လိုကနေဘယ်လိုစလိုက်တဲ့ ဇာတ်လမ်းလဲတော့ သိပ်မမှတ်မိပေမယ့် သူနဲ့ ချစ်သူဖြစ်တဲ့နေ့ကတော့ သူ့မွေးနေ့ဆိုတာ ကျွန်မသတိရမိတယ်။ သူက ကျွန်မနဲ့ လူမျိုးလဲမတူ ဘာသာလဲမတူ။ သူက ကရင်လူမျိုး၊ ခရစ်ယာန်ဘာသာ ကိုးကွယ်တယ်။ ကျွန်မက ဗမာလူမျိုး၊ ဗုဒ္ဓဘာသာကိုးကွယ်တယ်။ ကျွန်မတို့နှစ်ယောက်အတွက် ဒါတွေက အသေးအဖွဲကိစ္စတွေပါလို့ တွေးခဲ့ကြတယ်။ ဒါကြောင့်လည်း ယုံကြည်ချက်အတိုင်း နှစ်ဦးသဘောတူ ခရီးဆက်ခဲ့ကြတယ်။

သူ့အိမ်နဲ့ ကျွန်မအခုတက်နေတဲ့ကျောင်းကနီးတော့ နှစ်ယောက်တွေ့ရဖို့က အဆင်ပြေတယ်။ ကျောင်းကို နည်းနည်းစောထွက်လာပြီး သူနဲ့အတူ အချိန်ကုန်လေ့ရှိတယ်။ များသောအားဖြင့် အအေးဆိုင်သွားထိုင်တယ်။ တစ်ခါတစ်လေတော့ သူ့အိမ်မှာတွေ့ဖြစ်တယ်။ အဲဒီ့မှာ ပြဿနာကစတော့တာပဲ။ သူ့အမိုးကအမြဲအိမ်မှာရှိတယ်လေ။ နောက်ပြီး သူ့ညီမကလဲ ဇာတ်ပို့သိပ်ကောင်းတာ။ အဲဒီ့တော့မှ ဝတ္ထုကပိုပြီးအသက်ဝင်လာခဲ့တယ်။ နောက်တော့ သူ့အမိုးက ကျွန်မတို့နှစ်ယောက်အကြောင်းကို သိသွားတယ်။

"အို…………ပြဿနာတွေတက်……အို…………ပြဿနာတွေတက်"

မှတ်မိပါသေးတယ်။ မိုးအရမ်းရွာနေတဲ့နေ့တစ်နေ့ ကားဂိတ်မှာ တစ်နာရီလောက် မတ်တပ်ရပ်စောင့်လိုက်ရတာကို။ အဲဒီ့နေ့က သူတကယ်ရောက်မလာခဲ့ဘူး။ နောက်နေ့တွေ့တော့မှ သူ့ကို ရန်တွေ့လိုက်တယ်။ ဒီတော့ သူက…

"အမိုးက အိမ်တံခါး သော့ပိတ်ထားလို့။ ပြီးတော့ သော့ယူသွားတယ်ကွာ……အိမ်မှာသော့မရှိတော့ ဘာနဲ့ဖွင့်ပြီးထွက်ခဲ့ရမှာလဲ။ သူပြန်လာအောင်စောင့်ရတာပေါ့။ သူက အချစ်နဲ့ချိန်းထားတယ်ဆိုတာ သိတယ်။ အဲဒါကြောင့်မသွားခိုင်းတာနေမှာ။"

သူ့ဆီကဒီလိုစကားမျိုးကြားလိုက်ရတော့ တော်တော်အံ့ဩမိတယ်။ တကယ်တော့ ကျွန်မသူ့အမိုးကို သဘောမကျပါ။ သူ့ညီမဆိုပြောမနေပါနဲ့တော့။ ကျွန်မကသာ ဖော်ဖော်ရွေရွေနဲ့ သူတို့ကိုဆက်ဆံတာ သူတို့ကကျွန်မကိုတော်တော်ကြည့်မရဖြစ်နေကြတယ်။ ဖြစ်မှာပေါ့။ ကျွန်မချစ်သူက ကျွန်မနဲ့သူ့အကြောင်းတွေအကုန်လုံးကို ပြောပြနေတာကိုး။

ဒီလိုနဲ့ အချိန်တွေကြာလာတော့ သူ့အမိုးက ကျွန်မတို့နှစ်ယောက်ကိုဖြတ်ဖို့ တွန်းအားပေးလာပါရော။ သူ့ကိုသဘောတူထားတဲ့ မိန်းကလေးရှိတယ်တဲ့။ သူငယ်ချင်းရဲ့သမီးတဲ့လေ။ ဒီတော့ ကျွန်မဘာလုပ်ရမှာလဲ။ သူ့ကိုလက်လွှတ်ဖို့ပဲရှိတော့တာပေါ့။ သူ့ကို ကျွန်မတကယ်တော့ လက်မလွှတ်နိုင်ဘူး။ ကျွန်မရဲ့ချစ်စိတ်တွေနဲ့ပဲ သူ့ကိုသိမ်းပိုက်ထားလိုက်ချင်ခဲ့တာပါ။ ဒါပေမယ့် နောက်ပိုင်းမှာ ကျွန်မရဲ့မာနကိုထိခိုက်လာခဲ့တော့ ကျွန်မ မလွှတ်ချင်ဘဲ လွှတ်ချခဲ့ရတယ်။

လမ်းခွဲဖို့ကိစ္စကို ကျွန်မစိတ်တိုင်းကျ ဆုံးဖြတ်ခဲ့တဲ့အတွက် သူ့ကိုအရမ်းသနားမိတယ်။ ဒါပေမယ့်  သူတစ်ခွန်းမှမပြောခဲ့ဘူး။ သူမတားခဲ့ဘူး။ ကျွန်မစိတ်တိုင်းကျ သူလိုက်လျောခဲ့တယ်။ ကျွန်မဘဝမှာ ချစ်လျက်နဲ့လမ်းခွဲရတာလောက် မုန်းတာဘာတစ်ခုမှမရှိဘူး။ သူသိပါတယ် ကျွန်မသူ့ကိုဘယ်လောက်ချစ်လဲဆိုတာကို။ သူကျွန်မကိုကော ဘယ်လောက်ချစ်လဲဆိုတာတော့ ကျွန်မအပြင် သူ့မိသားစုတွေလည်းသိပါတယ်။ 

လမ်းခွဲပြီးတဲ့နောက် သူတစ်ယောက်တည်းနေရတာ အဆင်ပြေအောင် ကျွန်မရှောင်နေပေးပါတယ်။ ကျွန်မရည်းစားရသွားပြီလို့ သတင်းလွှင့်ခဲ့ပါတယ်။ ဒါမှ သူ့အမိုးပျော်ရွှင်ရမှာလေ။ ကျွန်မနဲ့သူ့သားကို သဘောမတူဘူးပြောတုန်းက မျက်ရည်တွေမြေခခဲ့တဲ့ သူတစ်ယောက်ကို အခုတော့ ကျွန်မအပျော်တွေပေးနိုင်ခဲ့ပါပြီ။ နောက်ပြီး ကျွန်မကိုမြင်ရင် မျက်နှာလွှဲတတ်တဲ့ သူ့ညီမကိုလဲ ကျွန်မကိုပြုံးပြလာအောင် ကျွန်မလုပ်နိုင်ခဲ့ပါတယ်။ 

ဒါပေမယ့် သူစိတ်ချမ်းသာမှာမဟုတ်ဘူးဆိုတာ ကျွန်မသိပါတယ်။ သူ့ကို သူငယ်ချင်းတစ်ယောက်လို ပြန်ခင်ဖို့ဆိုတာက တော်တော်ခက်တဲ့အလုပ်တစ်ခုပါ။ ကျွန်မနဲ့ သူအနေဝေးသွားပြီးတဲ့နောက်မှာတော့ ကျွန်မလွှင့်လိုက်တဲ့သတင်းအမှားကို သူယုံကြည်ခဲ့တယ်။ ဒါကြောင့်လဲ သူ့အိမ်ကပေးစားတဲ့ မိန်းကလေးနဲ့တွဲခဲ့တယ်ထင်တယ်။

ကျွန်မ သူ့ကိုအပြစ်မပြောပါဘူး။ ဘာဖြစ်လို့လဲဆို အဲဒီ့နောက်မှာ ကျွန်မလဲ ကျွန်မအရမ်းချစ်ရတဲ့သူနဲ့ တွေ့ခဲ့လိုပါ။ ဒါပေမယ့်……ကျွန်မ သူ့ကို အဲဒီ့ကိစ္စတွေနဲ့ ပတ်သတ်ပြီး စကားလုံးဝမဟခဲ့ဖူးပါဘူး။ ဟိုတစ်နေ့က Gtalk မှာတွေ့တော့ စကားအကောင်းပြောနေရင်းနဲ့ သူ့ရဲ့အခုချစ်သူအကြောင်းတွေလာပွားသွားတယ်။ ကျွန်မတော်တော်အံ့ဩသွားမိတယ်။ ကျွန်မသိတဲ့ ကျွန်မချစ်ခဲ့ဖူးသူက အဲလိုလူစားမျိုးမဟုတ်ဘူးဆိုတာ ကျွန်မယုံကြည်တယ်။ ဒါပေမယ့် ကျွန်မကိုသူတော်တော်များ နာကျည်းနေပြီလားမသိဘူးလေ။

ကျွန်မတွဲခဲ့ဖူးသမျှတွေထဲမှာ သူ့ကို အယုံကြည်ဆုံးနဲ့ အချစ်ဆုံးပါ။ ဒါပေမယ့် ဒီလိုမျိုးတွေကြားလိုက်ရတော့ ကျွန်မယုံကြည်မိခဲ့တဲ့သူ ပြောင်းလဲနေတယ်ဆိုတာ ကျွန်မသိလိုက်ရတယ်။ သူကပြောပါတယ်။ သူ့ကောင်မလေးကြောင့် သူတော်တော်ပြောင်းလဲသွားတာပါတဲ့။ အမှန်တကယ်တော့ ကျွန်မအယူသီးနေတာပါ။ ကျွန်မကိုသူအခုထိချစ်နေသေးတယ်လို့ ကျွန်မစိတ်ထဲမှာထင်နေတယ်။

သူ့ရင်ထဲမှာဘာတွေရှိနေတယ်ဆိုတာကို ကျွန်မကသိနေလိုပဲ။ အခုပြောနေတာတွေက ကျွန်မကိုလိမ်နေတယ်လို့ထင်နေမိတယ်။ ကျွန်မသူ့ကိုပစ်ထားခဲ့ပါစေ…သူကျွန်မကို ချစ်နေမှာပါဆိုတဲ့ အစွဲကိုဘယ်လိုဖျောက်ပစ်ရပါ့မလဲ……အဲဒီ့အစွဲကြောင့်ပဲ သူလိုလူက ပြောင်းလဲသွားတော့ ကျွန်မတုန်လှုပ်ခဲ့ရတာပေါ့။

ဘဝမှာ…… မထင်မှတ်ထားတာတွေက ဖြစ်လာတတ်သလို ထင်မှတ်ထားတာတွေကလည်း ပြောင်းလဲသွားတတ်တယ်။

(17 July 2012)

နရီ