အိပ်မပျော်တဲ့ညရဲ့ဇာတ်သိမ်း

"အိပ်မပျော်တဲ့ညရဲ့ဇာတ်သိမ်း"

ဒီနေ့ သူပြန်ရောက်မယ်ဆိုတာသိလို့ ကျွန်မအိပ်ရာနိုးတာနဲ့ ဖုန်းလေးကိုနှိပ်လိုက်တယ်။ ၀၉******* "ရင်ထဲမှာ လှုပ်ရှားမှုတစ်ခု ဘောင်ဘင်ခတ်သွားတယ်။"

"ဟဲလို…ကို အိပ်နေတုန်းလား" သူက "အင်း၊ဟုတ်တယ်"

"ဩော်…ဆောရီးနော်ကို၊ အိပ်နေရင်လဲ ပြန်အိပ်တော့နော် :)" ဆိုတော့ သူက

"ရပါတယ်၊ အခုဘယ်နှစ်နာရီရှိသွားပြီလဲ" လို့မေးလာတယ်။

"၉နာရီ ထိုးတော့မယ်၊ ကို ဒီနေ့ဘာလုပ်စရာတွေ ရှိသေးလဲ"

"၁၀နာရီမှာ တစ်ယောက်နဲ့ ချိန်းထားတယ်။ အဲဒါပြီးရင်တော့ မရှိပါဘူး"

"အင်းအင်း၊ ဒါဆိုလဲ သွားဖို့လုပ်တော့လေ၊ နောက်ကျနေဦးမယ်"

"ဟုတ်ပါပြီ၊ ဒါဆို တာ့တာနော်" ဆိုတော့ ကျွန်မလဲ "တာ့တာ"ရတာပေါ့။

ကျွန်မ သူနဲ့ဖုန်းပြောလိုက်ရတော့ ပျော်သွားတယ်။ နေ့ခင်းလောက်မှပဲ နောက်တစ်ခေါက် ဆက်မယ်ဆိုပြီး အိမ်မှာလုပ်စရာရှိတာတွေနဲ့ အချိန်ကုန်နေလိုက်တယ်။ ထမင်းစားခါနီး သူ့ကို သတိရသွားတာနဲ့ ဖုန်းဆက်လိုက်တော့…

"လူကြီးမင်း ခေါ်ဆိုသော တယ်လီဖုန်းမှာ စက်ပိတ်ထားပါတယ်ရှင်" တဲ့။

ဩော်…အစည်းအဝေးတွေများ ရှိနေလို့လားဆိုပြီး ဖုန်းကိုချထားလိုက်ပြီး ထမင်းစားပွဲမှာ ဝင်ထိုင်လိုက်တယ်။ "အရင်ကဆို သူဖုန်းကိုပိတ်ထားလေ့မရှိပါဘူး။" ဒီနေ့တော်တော်အရေးကြီးလို့ ထင်တယ်ဟု တွေးရင်းနဲ့ ထမင်းစားတဲ့အလုပ်ကို လုပ်လိုက်တယ်။

အချိန်တွေကမြန်လိုက်တာ နေ့ခင်းတောင်ဘယ်လိုရောက်သွားလဲ မသိဘူး။ "ဒီနေ့ ကျွန်မ ဘာမှမလုပ်ဖြစ်သလို ခံစားလိုက်ရတယ်။" ဖုန်းကိုထပ်ခေါ်လိုက်တယ်…ဖုန်းဝင်သွားတယ်။ ဒါပေမယ့် ဖုန်းကမအားတဲ့ အသံပဲပြန်လာတယ်။ ကျွန်မစိတ်ခုသွားပြီ။ ပထမတော့ ဖုန်းလိုင်းကဝင်ပြီးတော့ နောက်တော့ မအားတဲ့အသံပြောင်းသွားတာကို ကျွန်မ မကျေနပ်ပါ။ ဖုန်းတွေကပဲ မကောင်းတာလား၊ ဒါမှမဟုတ် ဖုန်းလိုင်းကပဲ မမိတာလား။ အတွေးတွေနဲ့ပဲ သူ့ဆီိကို စာပို့ထားလိုက်တယ်။

သတိရလို့ဖုန်းဆက်လိုက်တိုင်း စက်ပိတ်ထားတယ်ပဲအော်နေတယ်။ "ကျွန်မကလဲ ၅မိနစ် တစ်ခါလို သူ့ကို သတိရနေတော့ ခက်တာပေါ့။" ဖုန်းကိုလက်ကမချဘဲ ခေါ်နေတာ ကျောင်းကိုသာရောက်သွားတယ် စက်ပိတ်ထားတယ်ပဲ။ ဆရာမက အတန်းထဲကိုတောင် ရောက်နေလို့ မြန်မြန်ဝင်သွားပြီး ရှိတဲ့နေရာမှာဝင်ထိုင်လိုက်တယ်။ ရေစိုနေတဲ့ထီးကိုတောင် ပြီးမှသတိရသွားတယ်။ အနောက်မှာ သူများထီးတွေနဲ့အတူသွားလှန်းထားလိုက်တယ်။ 

ဆရာမက "Iron Lady" ဆိုတဲ့ရုပ်ရှင်ပြတော့ ကျွန်မတို့သူငယ်ချင်းတစ်စုက အနောက်မှာ လုပ်ချင်တာလုပ်ကြတာပေါ့။ ဂိမ်းကစားလိုက်၊ စကားပြောလိုက်၊ ဟာသတွေပြောလိုက်နဲ့ ရှိနေကြပေမယ့် စိတ်နဲ့ကိုယ်က မကပ်ဘူးဖြစ်နေတယ်။ "သူငယ်ချင်းတွေရယ်လို့ လိုက်သာပြုံးနေရတယ် ကျွန်မတကယ်ကော ပြုံးချင်ရဲ့လား။" ကျွန်မကိုကျွန်မ အတတ်နိုင်ဆုံး မငိုမိအောင် စိတ်ကိုထိန်းထားတယ်။ တစ်ယောက်တည်း ငုတ်တုတ်ထိုင်နေတယ်လို့ ခံစားရတယ်။

သူကဖုန်းကို တစ်ခါမှပိတ်ထားဖူးတာမဟုတ်တော့ ကျွန်မစိတ်ပူမိတာပေါ့။ ဒါကလဲ အထူးအဆန်းတော့ မဟုတ်ပါဘူး။ "ကိုယ်ချစ်ရတဲ့သူကို အဆက်အသွယ်လုပ်လို့မရရင် ဒီလိုပဲစိတ်ပူတတ်ကြမှာပဲလေ"။ စိတ်ပူရတဲ့ကြားထဲ အတန်းကလဲ နောက်ကျမှဆင်းတယ်။ ကားဂိတ်ရောက်လို့ ဖုန်းဆက်တော့ ဖုန်းက ကံကောင်းစွာနဲ့ ဝင်သွားတယ်။ ဒါပေမယ့် သူဖုန်းမကိုင်ဘူး။ နှစ်ခါတောင် ခေါ်တာနှစ်ခါလုံး မကိုင်ဘူး။ ကျွန်မဝမ်းမနည်းဘဲ နေနိုင်ပါဦးမလား။ 

ဒါပေမယ့် ကျွန်မအကောင်းဘက်ကပဲ တွေးလိုက်ပါတယ်။ သူရေချိုးခန်းဝင်နေလို့ဖြစ်မှာပါလို့။ ကားပေါ်ရောက်တော့ သူငယ်ချင်းက "ငါ့ဖုန်းနဲ့ ဆက်ကြည့်ပါလား" လို့ဖုန်းကိုပေးလာတော့ ကျွန်မလဲ ဖုန်းခေါ်လိုက်တာပေါ့။ တော်တော်ကြာမှ သူကိုင်တယ်။

"အလုပ်တွေအရမ်းရှုပ်နေလို့လား၊ အခုဖုန်းပြောလို့ရလား"

"အင်း၊ ဟုတ်တယ်" ဆိုတဲ့ နှစ်လုံးပဲကြားလိုက်တယ်။

"ဒါဆိုလဲ ညီမ ညမှပဲ ဖုန်းပြန်ခေါ်လိုက်မယ်" ဆိုတော့ "အင်း၊တာ့တာ" တဲ့။

သူငယ်ချင်းဖုန်းနဲ့ဆက်ရတာဆိုတော့ အားနာတယ်။ နောက်ပြီး ကားပေါ်မှာ သိပ်မကြားရဘူးလေ။ ဟိုတွေးဒီတွေးနဲ့ ကျွန်မဆင်းရမယ့် ကားဂိတ်ကိုရောက်လာတယ်။ ဟူး…တော်ပါသေးရဲ့ မိုးမရွာလို့။ ကိုယ့်ဘာသာကိုယ် ရေရွတ်လိုက်မိတယ်။ အဲဒီ့တော့မှ ကျွန်မ သတိထားမိလိုက်တာက ထီး ကျောင်းမှာမေ့ကျန်ခဲ့ပြီ။ ခက်တော့တာပဲ။ အဲဒါက ကျွန်မထီးမဟုတ်ဘူး။ အမေပိုင်တဲ့ထီး။ ဘယ်လိုလုပ်ရပါ့မလဲ။ ဒီအချိန်ဆိုကျောင်းမှာလဲ ဘယ်သူမှရှိတော့မှာမဟုတ်ဘူး။ "ကျွန်မဘာလို့ ထီးတစ်ချောင်းလုံးကိုတောင် မိုးတွင်းကြီးမှာ မေ့ကျန်ခဲ့ရတာလဲ။"

စိတ်ပျက်လက်ပျက်နဲ့ပဲ အဆူခံမယ်ဆိုတာသိပြီး အိမ်ကိုပြန်လာခဲ့တယ်။ အိမ်ရောက်တာနဲ့ သူ့ဆီကိုဖုန်းခေါ်ကြည့်တယ်။ စက်ပိတ်ထားတယ်ဖြစ်သွားပြန်ပြီ။ ဘာတွေဖြစ်နေလို့လဲ ဆိုတာသိချင်လို့ အင်တာနက်သုံးတော့လည်း ဘာမှသတင်းမထူးဘူး။ "နှစ်နာရီလုံးလုံးကို ဖုန်းခေါ်နေတာ စက်ပိတ်ထားတယ်ပဲ ပြောနေလို့ နောက်ဆုံးလက်လျှော့လိုက်ပြီး စာပဲပို့ထားလိုက်တယ်။" စာပို့လိုက်တဲ့အချိန်ကိုတော့ ခေါင်းထဲမှာစွဲနေတယ်၊ ည (၁၀) ထိုးပြီးနေပြီ။ ကျွန်မပို့လိုက်တဲ့စာက "စာရတာနဲ့ ဖုန်းပြန်ဆက်ပါလို့။"

ဒီညမှာ ကျွန်မမြင်နေရတာတွေက (23:00,00:00,01:00,02:00,03:00,04:00,05:00,06:00) ဆိုတဲ့ ဂဏန်းတွေပါ။ အဲဒီ့ကိန်းဂဏန်းတွေကိုပဲ မြင်နေတယ်။ "မြင်မှာပေါ့ ကျွန်မကဖုန်းကိုကိုင်ပြီး တစ်ချိန်လုံး ကြည့်နေတာကိုး။" အိပ်ဖို့ကြိုးစားနေတယ်လို့ ကိုယ့်ကိုကိုယ်ထင်နေပေမယ့် အိပ်မပျော်တာ။ စောင့်နေပေမယ့် မိုးလင်းဖို့ကိုတော့ မဟုတ်ဘူး။ သူ့ဆီကဖုန်းကိုပါ။ အမှန်က အိပ်ဖို့လဲ မကြိုးစားမိဘူး။ ထဖို့လဲ မကြိုးစားမိဘူး။ အဲဒီအတိုင်းလေး အိပ်ယာပေါ်မှာ မျက်လုံးလေးတွေဖွင့်ပြီး ဖုန်းအလာကိုပဲ မျှော်နေမိတာပါ။ မနက်လင်းတော့ ကျွန်မ သူ့ဆီကိုဖုန်းခေါ်လိုက်တယ်။

"လူကြီးမင်းခေါ်ဆိုသော တယ်လီဖုန်းမှာ စက်ပိတ်ထားပါတယ်ရှင်" 

ပြောရတဲ့သူတောင် မောနေဦးတော့မယ်လို့ ကျွန်မပေါက်ပေါက်ရှာရှာတွေးမိလိုက်သေးသည်။ အမှန်က ကျွန်မကိုကျွန်မရယ်အောင်လုပ်လိုက်ခြင်းသာ။ စိတ်ထဲမှာထူပူပြီး ရှုပ်ထွေးနေတယ်။ 

 ဘာလုပ်လို့ဘာကိုင်ရမှန်း မသိအောင်ကို ပျာယာခတ်နေတယ်။ မနေ့က သူငယ်ချင်းကို ဒီနေ့အတွက် ခွင့်စာပေးခဲ့တယ်။ အကယ်၍…ညနေစောင်းအထိသူ့ဆီက ဖုန်းမလာရင် သူ့ကို တစ်နည်းနည်းနဲ့ လိုက်ရှာဖို့ ကျွန်မဆုံးဖြတ်ထားတယ်။ "သူက မငယ်တော့ပေမယ့် တစ်ခါတစ်လေ ကလေးလို ဆိုးတတ်တယ်ဆိုတာကို ကျွန်မသိပါတယ်။ အခုပဲကြည့်လေ စိတ်ကူးပေါက်ရင်ပေါက်သလို ဖုန်းကိုပိတ်ထားလိုက်တာ တစ်ရက်နီးပါးပဲ။" ဒါကြောင့်လဲ စိတ်ပူနေရတာပေါ့။ 

မနက်ကတည်းက နာရီကိုမကြည့်မိသေးတာ အခုမှ ကြည့်မိတော့ ၉နာရီကျော်နေပြီ။ သူ့ဆီက ကူးစက်လာတဲ့ ရောဂါ၊ သက်ပြင်းရှည်တစ်ချက်ကို လေးလေးပင်ပင်နဲ့ချလိုက်ချိန်မှာပဲ……

"အတောင်ပံခတ်သံ အချက်တိုင်းမှာ ချစ်တယ်၊ ချစ်တယ်" ဆိုတဲ့ သီချင်းသံလေးနဲ့အတူ ကျွန်မဖုန်းလေး လှုပ်လာတယ်။ အိပ်မပျော်တဲ့ညရဲ့ ဇာတ်သိမ်းကတော့………

(26 June 2012)

နရီ