"ရပ်တန့်နေတဲ့ အချိန်နာရီတွေ"
ဒီနေ့မနက် မာမီက သူ့ရဲ့ ပင်စင်လစာ သွားထုတ်ပေးဖို့ ပြောတာနဲ့
ကျွန်မ လိုအပ်တဲ့ စာရွက်စာတန်းတွေ ယူပြီး ဆိုက်ကားနဲ့ ဘူတာရုံလမ်းထိပ်ကို ထွက်လာခဲ့တယ်။
နာရီကိုကြည့်လိုက်တော့ ၁၀ နာရီ နည်းနည်းကျော်နေပြီ။ ဒီအချိန်လောက်ဆိုရင်တော့ အစိုးရရုံးတွေ
ဖွင့်လောက်ပါပြီလို့ စိတ်ထဲက ရေရွတ်လိုက်မိတယ်။ကားဂိတ်ရောက်တော့ ၅၀ နဲ့ ဘာဒါကို ရောက်မယ့်
ဘတ်(စ်) ကားကို စောင့်နေလိုက်တယ်။ ကျွန်မရောက်ကတည်းက လာသမျှကားတွေက ၂၀၀ တန် (အထူး)
ကားတွေချည်းပဲ ဖြစ်နေတယ်။ ၅ မိနစ်လောက် စောင့်ပြီးတော့မှ (၄၅) ရောက်လာတာနဲ့ ကားပေါ်ပြေးတက်ခဲ့ရတယ်။
ဘတ်(စ်)ကားကမှေးရုံပဲမှေးတာဆိုတော့ အပြေးအလွှားတွယ်တက်ခဲ့ရတယ်။
ကားပေါ်လဲရောက်ရော အမောတောင် မဖြေရသေးဘူး…
"ရှေ့ကယာဉ်စီးခလေးလှမ်းပါဦး"
ဆိုပြီး စပယ်ယာ ကျွန်မ အနားရောက်လာတယ်။ တော်သေးသည်က ကျွန်မကြိုတင်ရှာထားသော
၅၀ တန်အဟာင်းလေးက လက်ထဲမှာရှိနေခြင်းပင်။ သူ့ပါးစပ်ထဲမှာလဲ ကွမ်းအပြည့်နဲ့ ဒရိုင်ဘာကို
ပလုတ်ပလောင်းစကားလှမ်းပြောလိုက်သေးတယ်။
"နောက်မှာ ဘူကောင် ပါလာတယ်၊ ဆင်းမယ့်သူမရှိရင် မောင်းသာမောင်း၊
တင်မနေနဲ့တော့ ဆရာရေ"
အဲဒီ့စကားက သေချာသာ ကိုင်ထားပေတော့ ဆိုတဲ့အဓိပ္ပါယ် ဆိုတာကို
ကားပေါ်ကလူတိုင်း သိလိုက်ကြတာ ကံကောင်းတယ်။ လက်တွေအားလုံးက မှီရာတိုင်တွေကို မြဲမြဲဆုပ်ကိုင်ထားလိုက်ကြတယ်။
တစ်ချို့ကတော့ မြန်မြန်မောင်းတာ ကောင်းတယ်လို့ပြောကြတယ်။ ကားတွေပြိုင်မောင်းတော့လဲ
သွားချင်တဲ့နေရာကို မြန်မြန်ရောက်တဲ့ အတွက် အားပေးကြတယ်။ ဒါပေမယ့် ကျွန်မအတွက်ကတော့
ဘေးကင်းရန်ကင်း မောင်းမယ်ဆိုရင် နှေးရင်နှေးပါစေ…နောက်ကျရင်နောက်ကျပါစေ အန္တရာယ် ကင်းဖို့ကသာ
အရေးကြီးသည် ထင်မိတယ်။ ကျွန်မက ကားဂိတ်နှစ်ဂိတ်လောက်ပဲ စီးလိုက်ရလို့ တော်သေးတယ်။
ကားဂိတ်ရောက်တော့ စပယ်ယာတွေ စည်းကမ်းရှိတာတွေ့ရတယ်။ သူတို့က
ကားပေါ်ကဆင်းတဲ့သူတွေကို အရင်ဦးစားပေးတယ်။ နောက်တော့မှ ကားပေါ်ကို တက်မယ့် ခရီးသည်တွေကို
တက်စေတယ်။ ဒါက သူတို့ရဲ့ စည်းကမ်းလို့ ကျွန်မမြင်တယ်။ တစ်ချို့လူတွေက ဒါလေးကိုတောင်
မလိုက်နာနိုင်ကြဘူး။ အလုအယက် တက်ကြတယ်။ ကားကရပ်ပေးနေပါတယ်ဆိုမှ ဆင်းနေတဲ့သူတွေကို အတင်းတွန်းပြီး
တက်ကြတယ်။ တစ်ခါတစ်လေကျတော့လည်း ဒါတွေကို ထိုင်ကြည့်ပြီး ရယ်ချင်တယ်။ တစ်ခါတစ်လေကျတော့
ဒါတွေကို ကြည့်ပြီးတရားပေါက်နေတယ်။ ဒီနေ့ကတော့ ရယ်လျက်နဲ့ပဲ ကားပေါ်ကဆင်းခဲ့တယ်။
မြန်မာ့စီးပွာရေးဘဏ် (ကမာရွတ်ဘဏ်ခွဲ) ဆိုတဲ့ ဆိုင်းဘုတ်ချိတ်ထားတဲ့
ဝင်းထဲကို ကျွန်မလှမ်းဝင်ခဲ့တယ်။ ဝင်းတစ်ခုလုံးအပြည့်နီးပါး ကားတွေရပ်ထားတယ်။ ဟ…လန်းလိုက်တာ။
ကားတွေက အကောင်းစားတွေချည်းပဲ။ ကားရပ်စရာနေရာတောင် ပြည့်နေပြီ။ ကျွန်မလဲ ဟိုကြည့်ဒီကြည့်နဲ့
နောက်ဆုံးတော့ အဆောက်အဦးထဲကို ဝင်လိုက်တယ်။ ပထမဆုံး ကျွန်မတွေ့လိုက်ရတာက "ငွေသွင်းရန်"
ဆိုတဲ့ဆိုင်းဘုတ်ချိတ်ထားတဲ့ နေရာ… လူတွေက နေရာတာကမှာ ပြည့်နေတယ်။ ထိုင်ခုံတွေမှာလဲ
အပြည့်၊ လူတွေဖြတ်သန်းသွားလာတဲ့ လျှောက်လမ်းမှာလဲ အပြည့်နဲ့။ အဲဒီ့နေရာက ကျွန်မလာတဲ့
ကိစ္စနဲ့ မဆိုင်ဘူးဆိုတော့ ကျွန်မရှေ့ဆက်လျှောက်ခဲ့တယ်။
အမှန်တကယ်တော့ ရှေ့ဆက်တိုးခဲ့တယ်ဆို ပိုမှန်မယ်။ လူတွေပြည့်ကျပ်နေတဲ့
နေရာတစ်ခုမှာ ရှေ့ရောက်အောင်တိုးရတာ တကယ်ကို မလွယ်တဲ့အလုပ်တစ်ခုပါ။ သူလိုကိုယ်လို ရွယ်တူတန်းတူဆိုရင်လဲ
ဟုတ်သေးတယ်။ ကိုယ့်ထက်ငယ်ရင်လဲ အဆင်ပြေသေးတယ်။ အခုတော့ ကျွန်မအသက်ထက် နှစ်ဆ၊ သုံးဆ
ကြီးတဲ့ သက်ကြီးရွယ်အိုတွေ ဖြစ်နေတော့ ခက်ပြီပေါ့။ တိုးရဖို့ကလဲ အခက်၊ နောက်ပြန်ဆုတ်ဖို့ကလဲ
မလွယ်နဲ့ ကြားထဲမှာ ဘာလုပ်ရမလဲကို စဉ်းစားလို့မရတော့တာ။ နောက်တော့ကျွန်မအနောက်ကနေ အဖွားတစ်ယောက်ရောက်လာတယ်။
သူကကျွန်မကိုကျော်တက်သွားပြီး အရှေ့ကနေတိုးတော့တာပါပဲ။ တိုးရင်းနဲ့အဖွားက
"မြေးလေး၊ ဒီလိုမှမတိုးရင် မရဘူး၊ သိလား"
ဆိုပြီး ကျွန်မကို အားမရတဲ့ ပုံစံနဲ့ လည်ပြန်လှည့်ကြည့်သွားသေးတယ်။
အဖွားက အဲ့လိုပြောမှတော့ ကျွန်မလဲ တိုးမယ်ဟာဆိုပြီး ဝင်တိုးရတော့တာပေါ့။ တိုးရင်းနဲ့
ပါးစပ်ကလဲ ကန်တော့ပါနော်။ ကန်တော့လို့ ပြောရတယ်။ နောက်ဆုံးတော့လည်း ကျွန်မ အထဲကိုရောက်လာခဲ့တယ်။
အဲဒီ့မှာ ညာဘက်နဲ့ ဘယ်ဘက်ခွဲတဲ့ နေရာရှိတယ်။ ပထမတစ်ခါလာတုန်းက စာအုပ်လာထုတ်တာ…အဲဒါက
ညာဘက်အခြမ်းမှာ။ အခုပိုက်ဆံလာထုတ်ဖို့အတွက်က ဘယ်ဘက်မှာ…
အဲဒါနဲ့ ဘယ်ဘက်ကို ကွေ့လိုက်ပြီး ဆက်လျှောက်လာလိုက်တယ်။
ပင်စင်ဌာန လို့ဆိုင်းဘုတ်တပ်ထားတဲ့ အခန်းထဲကို ဝင်သွားခဲ့တယ်။ ကံကောင်းစွာနဲ့ပဲ သဘောကောင်းတဲ့
ရုံးဝန်ထမ်းတစ်ယောက်နဲ့ သွားတွေ့တယ်။ သူက သေချာစနစ်တကျနဲ့ စာရွက်တွေကို စီစစ်ပေးပြီးတော့…
"ညီမလေး…ဟိုဘက်က ကောင်တာ သုံးခုမှာ သွားစောင့်နေလိုက်နော်၊
တစ်ခုခုကခေါ်လိမ့်မယ်၊ နည်းနည်းတော့ စောင့်ရမယ်" တဲ့။
သူညွှန်ပြတဲ့နေရာကို ကြည့်လိုက်တော့ ခုဏက ကျွန်မဖြတ်လာတဲ့
လူတွေအများကြီး ရှိတဲ့နေရာ။ ဒါနဲ့ သူကတောင် စောင့်ရမယ်ပြောတဲ့ပုံအထောက်တော့ ကြာမယ်ဆိုတာ
ကျိန်းသေနေပါပြီ။ ဒီလိုနဲ့ပဲ ခုဏက ကျွန်မဖြတ်လာတဲ့ လူအုပ်က ဘာကိုစောင့်နေလဲဆိုတာ သိလိုက်ရတယ်။
ငွေထုတ်ဖို့ ကောင်တာက ၃ ခုရှိတယ်။ လူက အယောက်
၃၀၀ မကဘူး။ ထိုင်စရာခုံက အယောက် ၃၀စာတောင် မရှိဘူး။ မတ်တပ်ရပ်ဖို့ကလဲ ထင်သလောက် မကျယ်တဲ့နေရာ
ဖြစ်နေတယ်။ ဒါကြောင့်လဲ ကောင်တာအရှေ့မှာ လူတွေပြည့်ကျပ်နေတာပေါ့။
ကောင်တာနံပါတ် (၁) က ကာကွယ်ရေးဘက်၊ စစ်ဘက်က လူတွေအတွက်သီးသန့်၊
ကောင်တာနံပါတ် (၂) က အရပ်ဘက်၊ မြို့ပြပင်စင်ထုတ်ရန် အတွက်လို့စာကပ်ထားပြီး ကောင်တာနံပါတ်
(၃) က ဘယ်လိုလူတွေကို ခေါ်လဲတော့ သေချာမသိပေမယ့် တုံကင်ယူပြီး တန်းစီရတာတော့ သိလိုက်တယ်။
သေချာမေးကြည့်လိုက်တော့ ကောင်တာနံပါတ် (၂) ကပဲ ခေါ်မှာ၊ တခြားနှစ်ခုနဲ့ မဆိုင်ဘူးတဲ့။
အဲ့လိုနဲ့ ကောင်တာ (၂)နဲ့ မလှမ်းမကမ်းမှာ နေရာယူလိုက်ရတယ်။
သတိထားမိသလောက်တော့ ကျွန်မ (၁၀း၁၅) လောက်ကရောက်တယ်။ စာရွက်စီတာနဲ့ဆို
(၁၀း၃၀) လောက်ကစပြီး နာမည်ခေါ်ဖို့စောင့်တယ်။ နာမည်တွေလဲခေါ်တယ်။ လူတွေကလဲ ထူးတယ်။ ငွေထုတ်ပြီးတဲ့သူတွေက
ပြန်တယ်။ ငွေထုတ်ဖို့လူတွေက ထပ်ရောက်လာတယ်။ နာမည်ကို ၅ ခေါက်ခေါ်လို့မှ မထူးရင် ကျော်တယ်။
နောက်တစ်ယောက်ကိုခေါ်တယ်။ စာရေးမတွေလား၊ စာရင်းကိုင်တွေလား၊ ငွေကိုင်တွေလားတော့ မသိဘူး…နာမည်ခေါ်လိုက်၊
ပိုက်ဆံရေလိုက်၊ ဟိုခြစ်ဒီခြစ် ခြစ်လိုက်၊ လက်မှတ်ထိုးခိုင်းလိုက်နဲ့ အလုပ်တွေကို ရှုပ်နေတာပဲ။
အဲဒါက မှန်ဘောင်ထဲက တူညီဝတ်စုံတွေနဲ့ လူတွေရဲ့ အလုပ်…သူတို့တွေက ပန်ကာလည်နေတဲ့အောက်
ထိုင်ခုံလေးပေါ်မှာထိုင်ပြီး အလုပ်လုပ်နေကြပေမယ့်….
အပြင်မှာ ပင်စင်လာထုတ်တဲ့ အဖိုးတွေ၊ အဖွားတွေကတော့ လှေကားထစ်
မှာထိုင်စောင့်သူကစောင့်၊ မရမကနေရာလေးမှာ ဝင်ထိုင်သူကထိုင်၊ မတ်တပ်ရပ်စောင့်သူက စောင့်နဲ့ပေါ့။
ပန်ကာမပြောနဲ့ လေဝင်ပေါက်တွေနဲ့ လေထွက်ပေါက်တွေတောင် လူတွေများလို့ ပိတ်နေပြီ။ အဲ့လိုပိတ်နေတဲ့ကြားက
ကျွန်မတို့ငွေလာထုတ်တဲ့ လူတွေအတွက် တစ်ခန်းလုံးမှာ မီးချောင်းက တစ်ချောင်းထဲပဲရှိတော့
ပ်ိတ်ရုံတင်မက မှောင်ပါမှောင်နေတော့တာပေါ့။ ဩော်…အဲဒီ့နေ့က မီးလဲပျက်နေသေးတယ်။ မီးပျက်နေတော့
မီးစက်နှိုးထားတယ်။ ဒါပေမယ့် အဲဒီ့မီးစက်အသံနဲ့ဆိုတော့ သူတို့နာမည်ခေါ်ရင် တော်ရုံနဲ့မကြားရဘူးဖြစ်နေတယ်။
"ဒေါ်အေးအေးသန်း….ဒေါ်အေးအေးသန်းရှိလား။ ဒေါ်အေးအေးသန်း၊
ဒေါ်အေးအေးသန်း"
"ရှိတယ်၊ ဒီမှာ ရှိပါတယ်ရှင်"
ဆိုပြီး အဒေါ်ကြီးတစ်ယောက် ကောင်တာနားကိုရောက်သွားတယ်။ သူ့ဆီက
စာရွက်ကိုပြလိုက်တော့
"ဒီဒေါ်အေးအေးသန်းကိုပြောတာ မဟုတ်ဘူး။ နံပါတ်မှားနေတယ်။
နောက်တစ်ယောက်ရှိရဦးမယ်။ ဒေါ်အေးအေးသန်း နံပါတ် (၅၇) ရှိလား"
သူက အဲ့လိုစောစောကတည်းက ခေါ်ပါလား။ နာမည်ခေါ်ရင် နာမည်တူမရှားဆိုသလို
လူတွေမှားနေမှာပေါ့။ နံပါတ်ခေါ်ရတာကမှ ပိုရှင်းသေးတယ်။ စိတ်ထဲကနေ အကြံဥာဏ်ပေးမိလိုက်တယ်။
ဒါကလဲ သူတို့လုပ်နေကျ လုပ်ရိုးထုံးစံလားမှ မသိတာ။ နာမည်တွေလဲ ခေါ်သာခေါ်နေတယ်။ ငွေထုတ်ပြီးတဲ့
သူတွေလဲ ပြန်သာပြန်နေတယ်…လူကတော့ မရှင်းသေးတာ သေချာပါတယ်။ သတိရလို့ နာရီကြည့်လိုက်တော့
(၁၁) ထိုးပြီ။ ဒီမှာ ဖိုးဖိုးတွေ ဖွားဖွားတွေ ဘယ်အချိန်လောက်ကတည်းကများ လာစောင့်နေကြတာလဲလို့
တွေးမိတော့…
အသက် (၈၀)ကျော်ကျော်လောက် အဖိုးအိုတစ်ဦး တောင်ဝှေးတစ်ချောင်းနဲ့
ဒယိမ်းဒယိုင်လျှောက်လာနေတာကိုမြင်လိုက်တယ်။ တော်တော်လေးကို စိတ်မကောင်းဖြစ်မိတယ်။ ကျွန်မ
အမေကတောင် အခုမှ အသက် (၅၀)ရှိသေးတယ်။ ကျွန်မက သူ့အတွက်နဲ့ ဒီကိုလာပြီး ကူညီပေးတယ်။
အဲဒီ့အဖိုးအိုရဲ့ သားတွေ၊ သမီးတွေ၊ ဒါမှမဟုတ် မြေးတွေက ဘာတွေများလုပ်နေကြလဲ မသိပါဘူးလို့
စဉ်းစားမိတယ်။ တကယ်တော့ အဲလောက်ထိ အသက်ကြီးနေပြီဖြစ်တဲ့ ပင်စင်စားတွေကို အိမ်အရောက်ငွေပို့ပေးလို့မရနိုင်ဘူးလား။
ဒါကနောက်ထပ်စဉ်းစားစရာတစ်ခုပေါ့။
"ဦးကြင်ညို ရှိလား…ဦးကြင်ညို…ခေါ်နေတာကြာပြီ။ ဘယ်ရောက်နေလဲ
မသိပါဘူး။"
နောက်တစ်ယောက်နာမည်ခေါ်နေပြန်ပါပြီ။ ဒါပေမယ့်…ပိုင်ရှင်ကဘယ်ရောက်နေမှန်းမသိတာနဲ့
ကျော်လိုက်ပြန်တယ်။ ကျော်သွားတဲ့သူတွေကို နောက်တစ်ခေါက်ပြန်ခေါ်ပေးမယ်လို့တော့ ပြောတယ်။
ဘယ်တော့လဲဆိုတာတော့ သေချာမသိရဘူးပေါ့။ စောင့်နေရင်းနဲ့ အိုက်လာလို့ အပြင်ထွက်ရင်ကောင်းမလား
စဉ်းစားနေတုန်း…
"သမီးရေ…ဒေါ်အမာကိုများခေါ်ပြီးသွားပြီလားဟင်… အဖွားဗိုက်ဆာလာလို့အပြင်မှာ
ထမင်းခဏသွားစားနေတာပါ။"
လို့ဆိုပြီး အဖွားအိုတစ်ဦးက ငွေထုတ်ကောင်တာက ဝန်ထမ်းကို
လှမ်းမေးတော့
"ခုဏကတည်းက ဒီနားမှာပဲနေပါဆိုတာကို ဘယ်တွေလျှောက်သွားနေမှန်းမှ မသိတာ။
ခေါ်တာ နှစ်ခါရှိနေပြီ။ ဒီမှာရော့"
ဆိုပြီး လက်မှတ်ထိုးဖို့ စာရွက်ထုတ်ပေးတယ်။
အဖွားက ဘယ်အချိန်ကတည်းက စောင့်နေရမှန်းမသိတဲ့ဟာ…နောက်ပြီး နံပါတ်နဲ့ခေါ်တာလဲ မဟုတ်တော့
နာမည်မခေါ်မချင်း ငုတ်တုတ်မဟုတ် မတ်တပ်သာ စောင့်နေရမည့်ပုံစံရှိနေတယ်။
လူကြီးတွေကိုတော့ တော်တော်သနားမိတယ်။ ကျွန်မဘေးက ထိုင်ခုံနေရာလွတ်တော့
အဲဒီ့နားမှာ ထိုင်နေတဲ့ အဒေါ်ကြီးက ထိုင်ဖို့နေရာပေးတယ်။ ဒါပေမယ့်…ကျွန်မ နေရာမယူခဲ့ပါဘူး။
ကိုယ့်ထက် အသက်ကြီးတဲ့ သူတွေနဲ့ သူတို့တွေခေါ်လာတဲ့ သူတို့ရဲ့ မြေးပေါက်စလေးတွေအတွက်
နေရာပေးလိုက်တယ်။ တကယ်တော့ ကျွန်မမတ်တပ်ရပ်ရင်း အမှီတစ်ခုရှိနေလို့သာ။ အဲဒီ့နေရာမှာ
မှီဖို့သံဗန်းသာမရှိဘူးဆိုရင် ကျွန်မ အသက်ရှူကျပ်ပြီး လဲကျသွားလောက်ပါပြီ။
ဘေးပတ်ဝန်းကျင်ကို ကြည့်လိုက်တော့ ကျွန်မထက် အသက်အများကြီး
ကြီးတဲ့ လူတွေက အားကြိုးမာန်တက်နဲ့ ပိုက်ဆံလေး တစ်သောင်း၊ နှစ်သောင်းကနေ တစ်သိန်း၊
နှစ်သိန်းဆိုတဲ့ ငွေပမာဏအထိကို ထုတ်ယူဖို့ စောင့်နေကြပါလား။ ကျွန်မသာ သူတို့နေရာ၊ သူတို့အသက်အရွယ်မှာဆိုလဲ
ဒီလိုပဲ လာစောင့်နေမိမှာပဲလို့ တွေးမိတယ်။ အလုပ်လုပ်ဖူးတဲ့ သူတွေက အလုပ်ကပေးတဲ့ လခရဲ့
တန်ဖိုးကို သိကြတယ်။ အလုပ်မလုပ်တော့ဘဲ ပင်စင်လစာနဲ့ စားနေရတဲ့ သူတွေက အလုပ်ကပေးတဲ့
ပင်စင်လစာရဲ့ တန်ဖိုးကို သိကြတယ်လေ။
ဟိုတွေး…ဒီတွေးနဲ့ ကျွန်မကို အတွေးတွေထဲကနေ ဆွဲထုတ်လိုက်တာက
ကင်မရာတစ်ခု။ မဟုတ်သေးဘူး…သေချာကြည့်လိုက်တော့ ဖုန်းပါ။ ဟုတ်တယ်။ ဖုန်းနဲ့ ဓာတ်ပုံလိုက်ရိုက်နေတာ။
ဓာတ်ပုံတင်မဟုတ်သေးဘူး။ ဗီဒီယိုပါ ရိုက်နေတာပဲ။ သူ့ပုံကိုကြည့်ပြီး သေချာသိလိုက်ရတာက
ဒီရုံးက ဝန်ထမ်းဆိုတာပဲ… ဟုတ်ပါတယ်။ ရုံးက ဝန်ထမ်းက လာတဲ့လူတွေကို ဓာတ်ပုံပြန်ရိုက်တော့
ကျွန်မ နည်းနည်း အံ့ဩမိတယ်။ ဘာကြောင့်ရိုက်လဲဆိုတာကတော့ မှန်းရခက်မယ်။ ဖြစ်နိုင်ချေရှိတာက
မှတ်တမ်းတင်ဖို့လို့ထင်တာပဲ။
ကျွန်မလဲ တခြားသူတွေလိုပဲ ဟိုကြည့်ဒီကြည့်နဲ့ နာရီကြည့်မိတော့
(၁၁း၃၀) ပြီ။ ဗိုက်ကလဲ ဆန္ဒပြလာပြီလေ…မနက်ကတော့ ပေါင်မုန့်စားလာပေမယ့် အခုတော့ ဗိုက်ထဲမှာဘာမှမရှိတော့ဘူး
ထင်တယ်။ ကျွန်မစောင့်နေတာ ၁ နာရီတောင်ထိုးပြီပဲ။ အဲလောက်ကြာမယ်မှန်းသိရင် ကျွန်မကြိုတင်ပြင်ဆင်လာမှာပေါ့။
အခုတော့ မုန့်လဲပါမလာ…ပိုက်ဆံလဲ ပါမလာနဲ့။ အပြင်မှာသွားထွက်စားလို့လဲ မရလေတော့ ငတ်ပြီလေ။
"ဒေါ်ခင်ဝင်းစိန် ရှိလား။ ဒေါ်ခင်ဝင်းစိန်"
ဆိုတဲ့
အသံက ကျွန်မနားထဲကို တိုးဝင်လာတယ်။ ခန္ဓာကိုယ်က မလှုပ်ရှားနိုင်သေးခင်မှာ ပါးစပ်ကအရင်
ရှိပါတယ်လို့ပြောဖို့ ဦးနှောက်က မနည်းသတိပေးလိုက်ရတယ်။ နောက်ဆုံးတော့ ကျွန်မ စာရွက်မှာ
လက်မှတ်ထိုးပြီး ငွေထုတ်လာနိုင်ခဲ့ပြီလေ။ ကျွန်မကတော့ ဝဋ်ကျွတ်သွားပေမယ့် တခြားတခြားသော
အဖိုးတွေ၊ အဖွားတွေကတော့ စောင့်လျက်၊ စောင့်ဆဲ၊ စောင့်မြဲ အတိုင်းပါပဲ။
အဲဒီ့နေရာက ဘယ်လိုနေရာလဲဆို စောင့်နေသူတွေအတွက် ရပ်တန့်ထားတဲ့
နာရီနဲ့ စောင့်ဆိုင်းနေသူတွေအတွက် ရှေ့မဆက်တော့တဲ့ အချိန်တွေပါပဲ။
(26.9.2012)
No comments:
Post a Comment